عن الأوغاد صحاب السوء.. قصيدة عمرو حسن

 عمرو حسن

عن الأوغاد صحاب السوء

وعن شلة بتجمع بين

(تجارة وهندسة وحقوق)

وعن لمتنا ليلة العيد

وعن خطة ريال مدريد

وعن علبة سجاير (كينت) تتفرتك ف فيلم جديد

وعن قهوة زيادة تقيل

وسقعة ف كوبري قصر النيل

وعن هزيمتنا بالصدفة ف آخر ثانية م البرازيل

وعن بوسة بنسرقها ف آخر صف ف السيما

وعن تذنيبة الواحد عشان يحضر (بلاك تيما)

وعن واجب ف يوم فرحك

في غاية قلة القيمة

وعن لبس ف دولاب صاحبك تشُك بإن ده بتاعك

وعن تهريج قلَب بغباء فــ سايب جرح ف دراعك

وعن (من بكره هنصلي)، وننسى نصلي كالعادة !

وأول يوم تشوف صاحبك ببدلة جيش وببيادة

وعن أفلام محمد خان وعن أنغام

وعن نفس السؤال إياه (جايب جذمتك دي بكام ؟)

وعن شغل المراكبية (تعالى اتفضّل اشرب شاي)

وعن طلعتنا ع الساحل و(مين قال جاي ؟)

وعن ضحكة حسن فايق وعن ألحان عمر خيرت

وعن ألبوم منير الجاي

وعن أحلام حاولنا كتير نحققها وماقدرناش

وعن أوقات صحيح صعبة

لكن ليها لزوم تتعاش

عن الشلة اللي انا منها

ومهما باقول دي ناس صايعين

يلاقوا مصيبة نعملها ألاقي نفسي قولت آمين

يا أصحابي

يا أصيع خلق ف العالم

أنا ممتن ليكو بجد

على وقفتكو وقت الجد

وع السر اللي ف صدوركوا ولاقولتوه ف مرة لحد

أنا والله باشكركم

وبأمركم تكوني معايا للآخر

بضحكتكوا اللي بنت بنوت

عن العِشرة اللي عاوزة تعيش..

ف عز ما فيه حاجات بتموت.

Advertisements

شارك برأيك.. كتابة الإيميل والموقع ◄ «اختياري»

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s