المنجِّد.. مصطفى الجارحي

أنا جيت.. أنجد

عند بيت عنايات

نادت صواني القُلل

على كوبايات شربات

زغاريد دي والاَّ نايات

طايرة من الشبابيك

يا قطن ما أجملك

يا قطن مين يشتريك

ويَّا القماش لو شيك

 

قالت لي أم العروسة

عايزة مراتب نوسة

منفوشة زي كانيش

والخُدَّاديات من ستان

والألحفة بكرانيش

وعايزة أجمل ما عندك

وعندي فوق أُجرتك

يابو العيال بقشيش

فقلت سمعاً وطاعة

يا أم العروسة ياريت

فى كل بيت.. ألقى زيّك

ده انتي اللي زيّك مفيش.

***

أنا أسطى سيد منجد

والقوس يبوس يسراي

فيه غرزة تطلع قصب

وغرزة زي الدهب

والتالتة من جواي

عقل البشر يا بشر

دلوقتي بقى نسَّاي

فاعزمنى على كوباية شاي

أو بُن بس على الريحة

اللي اتخدع بسفنج خلاص

ما عادش له نومة مريحة

إعزمني على حجرين شيشة

خسِّيت بقيت خُف الريشة

من بعد ما كنت معلِّم

لا حد بالعربون سلِّم

ولا حد قال لي تعالى نجّد

حتى فـ فرح سامي وعيشة !

 

يا قطن ياللي طويل تيلك

كان كل بيت بيغني لك

دلوقتي طِفيت قناديلك

وانا خلاص شلت الفيشة.

…………….

* من كتاب (المهن).